សមិទ្ធិផលជោគជ័យ និងគំនិតផ្តួចផ្តើមថ្មី

សាលាបឋមសិក្សាប្រាសាទ ស្ថិតនៅក្នុងភូមិផ្លាំង ឃុំព្រៃជ្រូក ស្រុកពួក ខេត្តសៀមរាប ដែលជាតំបន់ជនបទដ៏ដាច់ស្រយាលមួយ មានចម្ងាយប្រមាណ ៤២ គីឡូម៉ែត្រពីទីរួមខេត្តសៀមរាប។ សាលានេះស្ថិតនៅជិតមាត់បឹងទន្លេសាបខាងលិច ដែលជាតំបន់ប្រឈមនឹងបញ្ហាសេដ្ឋកិច្ច និងហេដ្ឋារចនាសម្ព័ន្ធនៅមានកម្រិត។ ក្នុងចំណោមសាលាបឋមសិក្សា ៣១ នៅខេត្តសៀមរាប ដែលទទួលបានការគាំទ្រពីគម្រោង សហគមន៍នេសាទបង្កើតការងារជាសេដ្ឋកិច្ចវិលជុំនៅបឹងទន្លេសាបភាគខាងលិច តំបន់១ (FOSTER)  សាលាបឋមសិក្សាប្រាសាទជាគំរូមួយដ៏លេចធ្លោ ដែលបានបង្ហាញពីការផ្លាស់ប្តូរគួរឱ្យកត់សម្គាល់។

 

សាលារៀននេះមានគ្រូបង្រៀនចំនួន ១៩ នាក់ (ស្ត្រី ៨ នាក់) ក្នុងនោះមានគ្រូកិច្ចសន្យា ៨ នាក់ (ស្ត្រី ៧ នាក់)។ សាលារៀនបានផ្តល់ការអប់រំចាប់ពីថ្នាក់ទី១ ដល់ថ្នាក់ទី៦ ដោយមានសិស្សសរុប ៤២៤ នាក់ (ស្ត្រី ២០៨ នាក់)។ ទោះបីជាមានចំនួនសិស្ស និងគ្រូបង្រៀនគួរឱ្យកត់សម្គាល់ក៏ដោយ សាលានេះបានប្រឈមមុខនឹងបញ្ហាជាច្រើន ទាំងផ្នែកហេដ្ឋារចនាសម្ព័ន្ធ និងគុណភាពអប់រំ មុនពេលទទួលបានការអន្តរាគមន៍។

 

លោក យី ខប ជានាយកសាលាបឋមសិក្សាប្រាសាទ ដែលមានតួនាទីដ៏សំខាន់ក្នុងការគ្រប់គ្រង និងជំរុញការអភិវឌ្ឍសាលា។ លោកទទួលខុសត្រូវលើការងារជាច្រើន រួមមាន៖

• រៀបចំផែនការបង្រៀន និងអភិវឌ្ឍន៍សាលា។
• ធ្វើការជាមួយគណៈកម្មការគ្រប់គ្រងសាលា និងសហគមន៍។
• ពិនិត្យ និងជួយគ្រូបង្រៀនក្នុងការបង្រៀន។
• កៀរគរធនធានពីសហគមន៍ និងអង្គការដៃគូ។
• ចូលរួមវគ្គបណ្តុះបណ្តាល និងនាំយកចំណេះដឹងថ្មីមកសម្រាប់អនុវត្តន៍។

 

ទោះបីជាលោក យី ខប មានការប្តេជ្ញាចិត្តខ្ពស់ក៏ដោយ ក៏សាលារៀននៅតែប្រឈមនឹងបញ្ហាជាច្រើន។ លោកបានរៀបរាប់អំពីស្ថានភាពសាលារៀនកាលពីពីរឆ្នាំមុនថា៖ “សាលារបស់ខ្ញុំមានបរិស្ថានមិនទាន់ល្អ។ ទីធ្លាសាលាមិនមានក្រាលការ៉ូឡា សិស្សគ្មានកន្លែងទទួលទានអាហារពេលព្រឹក គ្មានកន្លែងចតកង់ និងផ្លូវចូលសាលាមិនទាន់ចាក់បេតុង។ សួនច្បារ និងដើមឈើមានតិចតួច ហើយគុណភាពសិក្សារបស់សិស្សធ្លាក់ចុះខ្លាំង ដោយសារវិបត្តិជំងឺកូវីឌ-១៩។ សិស្សរៀនយឺតច្រើន ខ្វះសម្ភារៈសិក្សា និងទឹកស្អាតសម្រាប់ប្រើប្រាស់។ សីលធម៌សិស្សនៅមានកម្រិតទាប ហើយការបែងចែកសំរាមមិនទាន់មានសណ្តាប់ធ្នាប់”។

 

បញ្ហាទាំងនេះបានធ្វើឱ្យសាលារៀនពិបាកទាក់ទាញសិស្ស និងទទួលបានការគាំទ្រពីសហគមន៍។ អត្រាបោះបង់ការសិក្សាក៏មានកម្រិតខ្ពស់ ដោយសារការលំបាកផ្នែកសេដ្ឋកិច្ច និងកង្វះការយល់ដឹងអំពីសារៈសំខាន់នៃការអប់រំ។

 

នៅឆ្នាំ២០២២ គម្រោង សហគមន៍នេសាទបង្កើតការងារជាសេដ្ឋកិច្ចវិលជុំនៅបឹងទន្លេសាបភាគខាងលិច តំបន់១ បានចាប់ផ្តើមអន្តរាគមន៍នៅសាលាបឋមសិក្សាប្រាសាទ ដោយផ្តល់ការគាំទ្រទាំងផ្នែកហេដ្ឋារចនាសម្ព័ន្ធ និងការបណ្តុះបណ្តាលសមត្ថភាព។

 

លោក យី ខប បានរៀបរាប់អំពីផលប៉ះពាល់នៃគម្រោងនេះ៖ “បន្ទាប់ពីគម្រោង FOSTER ចូលមកអន្តរាគមន៍ ខ្ញុំទទួលបានចំណេះដឹងថ្មីៗជាច្រើន ដូចជារបៀបជ្រើសរើសសិស្សអាហារូបករណ៍ ការធ្វើផែនទីសិក្សា បច្ចេកទេសបង្រៀនសិស្សរៀនយឺត និងការកៀរគរធនធានពីសហគមន៍។ យើងក៏បានទទួលឱកាសទស្សនកិច្ចសិក្សានៅសាលាវត្តបូព៍ និងអនុវត្តកម្មវិធីបង្រៀនពេញម៉ោង។”

 

គម្រោង FOSTER បានផ្តល់វគ្គបណ្តុះបណ្តាលជាច្រើន ដែលគ្របដណ្តប់លើប្រធានបទសំខាន់ៗដូចខាងក្រោម៖

• ការគ្រប់គ្រងសាលារៀន៖ ការធ្វើផែនការអភិវឌ្ឍន៍សាលា និងការធ្វើផែនទីសិក្សា។
• បច្ចេកទេសបង្រៀន៖ វិធីសាស្ត្រជួយសិស្សរៀនយឺត និងការធ្វើតេស្តវាយតម្លៃ។
• ការគាំទ្រសិស្ស៖ កម្មវិធីអាហារូបករណ៍ និងកម្មវិធីទីប្រឹក្សាសម្រាប់កុមារី។
• ការកៀរគរធនធាន៖ ការទាក់ទងជាមួយសហគមន៍ និងអង្គការមិនមែនរដ្ឋាភិបាល (NGO)។

 

លើសពីនេះ គម្រោងនេះបានជួយធ្វើឱ្យប្រសើរឡើងនូវហេដ្ឋារចនាសម្ព័ន្ធសាលារៀន ដូចជា៖

• ក្រាលការ៉ូឡានៅទីធ្លា និងមុខថ្នាក់រៀន។
• សាងសង់រោងដាក់ធុងចម្រោះទឹកស្អាត។
• កែលម្អសួនច្បារ និងដាំដើមឈើបន្ថែម។
• សាងសង់ឡដុតសំរាម និងកន្លែងបែងចែកសំរាម។
• ដាក់រូបសំណាកព្រះបាទជ័យវរ្មនទី៧ ដើម្បីជាការបំផុសគំនិត។

 

ការអន្តរាគមន៍របស់គម្រោង FOSTER បាននាំមកនូវការផ្លាស់ប្តូរគួរឱ្យកត់សម្គាល់ទាំងផ្នែកគុណភាពអប់រំ និងបរិស្ថានសាលារៀន។

 

លោក យី ខប បានរៀបរាប់ថា៖ “សាលារៀនខ្ញុំឥឡូវមានការប្រែមុខមាត់ថ្មី។ សិស្សមានទឹកស្អាតប្រើប្រាស់ មានកន្លែងរៀនស្អាតជាងមុន និងមានបរិស្ថានល្អប្រសើរ។ គុណភាពសិក្សារបស់សិស្សបានកើនឡើង អត្រាបោះបង់ការសិក្សាថយចុះ ហើយសហគមន៍មានជំនឿទុកចិត្តលើសាលារៀនកាន់តែច្រើន ”។

 

លទ្ធផលជាក់លាក់រួមមាន៖

1. គុណភាពអប់រំ៖ សិស្សរៀនយឺតទទួលបានការបំប៉នបន្ថែម ដែលជួយឱ្យពួកគេតាមទាន់កម្រិតថ្នាក់។
2. អត្រាបោះបង់ការសិក្សា៖ ការគាំទ្រផ្នែកអាហារូបករណ៍ដល់សិស្សក្រីក្រ និងការចូលរួមពីសហគមន៍បានជួយកាត់បន្ថយអត្រាបោះបង់។
3. ការចូលរួមរបស់សហគមន៍៖ អាណាព្យាបាលបានបញ្ជូនកូនមកសាលារៀនទៀងទាត់ ទោះបីជាក្នុងរដូវវស្សាក៏ដោយ។
4. បរិស្ថានសាលា៖ សាលាមានបរិស្ថានស្អាតស្អំ និងទាក់ទាញ ដែលជួយឱ្យសិស្សចូលចិត្តមករៀន។
5. សមត្ថភាពគ្រូ និងនាយក៖ គ្រូបង្រៀន និងនាយកមានជំនាញគ្រប់គ្រង និងបង្រៀនកាន់តែប្រសើរ ដោយសារវគ្គបណ្តុះបណ្តាល។

 

លោក យី ខប បានសង្កត់ធ្ងន់លើសារៈសំខាន់នៃការចូលរួមពីសហគមន៍ថា៖ “ដោយមានការគាំទ្រពីគម្រោង FOSTER និងការចូលរួមពីអាណាព្យាបាល យើងអាចធ្វើឱ្យសាលាក្លាយជាកន្លែងដែលសិស្សចូលចិត្តសិក្សា និងសហគមន៍មានមោទនភាព”។

 

ម្តាយរបស់សិស្សម្នាក់នៅក្នុងភូមិផ្លាំងបានចែករំលែកនូវពិសោធន៍របស់គាត់ថា៖ “ពីមុន ខ្ញុំមិនសូវជឿជាក់លើសាលានេះទេ ព្រោះផ្លូវចូលលំបាក ហើយសាលាមិនសូវស្អាត។ ឥឡូវខ្ញុំឃើញកូនខ្ញុំសប្បាយចិត្តមករៀន ហើយខ្ញុំក៏ចូលរួមជួយសាលារៀនដែរ “។

 

ការផ្លាស់ប្តូរនៃសាលាបឋមសិក្សាប្រាសាទ គឺជាសក្ខីភាពបញ្ជាក់ពីឥទ្ធិពលនៃការធ្វើអន្តរាគមន៍នៅសាលារៀនគោលដៅ ការចូលរួមពីសហគមន៍ និងភាពជាអ្នកដឹកនាំប្តេជ្ញាចិត្ត។ តាមរយៈគម្រោង FOSTER សាលារៀននេះមិនត្រឹមតែបានធ្វើឱ្យប្រសើរឡើងនូវហេដ្ឋារចនាសម្ព័ន្ធរូបវន្តប៉ុណ្ណោះទេ ប៉ុន្តែថែមទាំងបានលើកកម្ពស់គុណភាព ការអប់រំ និងជំរុញឱ្យមានមោទនភាព និងភាពជាម្ចាស់ការក្នុងចំណោមសិស្ស គ្រូបង្រៀន និងសហគមន៍។ ករណីសិក្សានេះជាគំរូដ៏ល្អជំរុញទឹកចិត្តសម្រាប់សាលារៀនជនបទផ្សេងទៀតដែលកំពុងប្រឹងប្រែងឆ្ពោះទៅរកវឌ្ឍនភាព៕

 

រូបថតដោយអង្គការ AEA!