គម្រោងលើកកម្ពស់ការអប់រំឌីជីថលសម្រាប់សិស្សានុសិស្ស (IDEAL) បានរៀបចំដំណើរទស្សនកិច្ចសិក្សាមួយដ៏មានសារៈសំខាន់ ដើម្បីត្រួតពិនិត្យ និងវាយតម្លៃការប្រើប្រាស់ឧបករណ៍ឌីជីថលនៅតាមសាលារៀនគោលដៅ។ ដំណើរទស្សនកិច្ចនេះមានគោលបំណងពង្រឹងការអប់រំឌីជីថល និងធានាឱ្យបណ្ណាល័យ និងបន្ទប់កុំព្យូទ័រនៅតាមសាលារៀននៅតែស្ថិតក្នុងស្ថានភាពល្អប្រសើរ ដើម្បីបម្រើការសិក្សារបស់សិស្សានុសិស្ស។ ដំណើរទស្សនកិច្ចនេះបានធ្វើឡើងក្រោមការដឹកនាំរបស់លោក Jeakyun Rho នាយកប្រចាំប្រទេស និងលោកស្រី Nambee Yoon នាយករងប្រចាំប្រទេស ដែលជាតំណាងមកពីអង្គការឆាលហ្វានកូរ៉េ ដែលជាម្ចាស់ជំនួយគម្រោង ហើយសម្របសម្រួលដោយលោក ស សុផាណាក់ អ្នកសម្រួលគម្រោង។

 

ដំណើរទស្សនកិច្ចនេះបានផ្តោតលើគោលបំណងសំខាន់ៗចំនួនបួន៖

 

១) វាយតម្លៃប្រសិទ្ធភាពនៃការបណ្តុះបណ្តាល
ក្រុមការងារបានធ្វើការស្តាប់យោបល់ផ្ទាល់ពីអ្នកទទួលផលរបស់គម្រោង IDEAL រួមមាន គ្រូបង្រៀន បណ្ណារក្ស និងនាយកសាលា។ ការពិភាក្សាបានផ្តោតលើការអនុវត្តជាក់ស្តែងនៃចំណេះដឹង និងជំនាញដែលទទួលបានពីវគ្គបណ្តុះបណ្តាលរបស់គម្រោង IDEAL។ មតិយោបល់ទាំងនេះបានជួយឱ្យក្រុមការងារយល់កាន់តែច្បាស់អំពីបញ្ហាប្រឈម និងភាពជោគជ័យនៅក្នុងការអនុវត្តបច្ចេកវិទ្យាឌីជីថលក្នុងការបង្រៀនប្រចាំថ្ងៃ។

 

២) ពិនិត្យមើលការចូលរួមរបស់សិស្ស
ក្រុមការងារបានផ្តោតលើសកម្មភាព និងវឌ្ឍនភាពរបស់ក្លឹបឌីជីថលសិស្ស ដែលទើបបានបង្កើតឡើងនៅក្នុងក្រុមប្រឹក្សាសិស្ស។ ក្លឹបទាំងនេះបានបង្ហាញពីការចូលរួមយ៉ាងសកម្មរបស់សិស្សក្នុងការសិក្សាមុខវិជ្ជាឌីជីថល និងបានបង្កើតឱកាសសម្រាប់សិស្សក្នុងការអភិវឌ្ឍជំនាញថ្មីៗ ដែលជួយពួកគេឱ្យសម្របខ្លួនទៅនឹងសម័យឌីជីថល។

 

៣) ត្រួតពិនិត្យការគ្រប់គ្រងប្រតិបត្តិការ
ក្រុមការងារបានសិក្សាលើយុទ្ធសាស្ត្រដែលសាលារៀនបានអនុវត្ត ដើម្បីដោះស្រាយបញ្ហាប្រឈមនានា ជាពិសេសទាក់ទងនឹងការគ្រប់គ្រងថ្លៃអគ្គិសនី ការបណ្តុះបណ្តាលគ្រូបង្រៀនផ្នែក ICT និងការថែទាំឧបករណ៍ឌីជីថលថ្មីៗ។ ការពិនិត្យនេះបានជួយកំណត់ចំណុចខ្វះខាត និងផ្តល់អនុសាសន៍សមស្របដើម្បីធ្វើឱ្យប្រសើរឡើងនូវប្រសិទ្ធភាពប្រតិបត្តិការ។

 

៤) វាយតម្លៃការត្រៀមខ្លួនរបស់សាលារៀនជំនាន់ថ្មី វិទ្យាល័យព្រែកលៀប
ដំណើរទស្សនកិច្ចបានផ្តល់ឱកាសឱ្យក្រុមការងារវាយតម្លៃសមត្ថភាពរបស់វិទ្យាល័យព្រែកលៀបក្នុងការត្រៀមខ្លួនសម្រាប់ការអនុវត្តកម្មវិធីក្រុមហ៊ុន Certiport និងបន្ទប់កុំព្យូទ័រ (ICT Lab) ដែលបានស្នើឡើងថ្មី។ ការវាយតម្លៃនេះបានផ្តោតលើហេដ្ឋារចនាសម្ព័ន្ធ និងសមត្ថភាពបច្ចេកទេសរបស់សាលារៀន ដើម្បីធានាថាកម្មវិធីនេះនឹងដំណើរការបានជោគជ័យ។

 

ក្នុងអំឡុងដំណើរទស្សនកិច្ច លោក Jeakyun Rho និងលោកស្រី Nambee Yoon បានសម្តែងនូវការកោតសរសើរយ៉ាងជ្រាលជ្រៅចំពោះការលះបង់របស់នាយក នាយិកា លោកគ្រូ អ្នកគ្រូ និងបុគ្គលិកសាលារៀន ដែលបានខិតខំប្រឹងប្រែងក្នុងការផ្តល់ចំណេះដឹងឌីជីថលដល់សិស្សានុសិស្ស។ ពួកគាត់បានជួយណែនាំសិស្សឱ្យសម្របខ្លួនទៅនឹងការផ្លាស់ប្តូរនៃសម័យឌីជីថល ដោយទទួលបានការគាំទ្របច្ចេកទេសយ៉ាងសំខាន់ពីគម្រោង IDEAL តាមរយៈវគ្គបណ្តុះបណ្តាលពង្រឹងសមត្ថភាព។

 

ដំណើរទស្សនកិច្ចនេះមិនមែនជាការត្រួតពិនិត្យធម្មតាមួយនោះទេ ប៉ុន្តែជាឱកាសសម្រាប់ការសិក្សាស៊ីជម្រៅ ដើម្បីស្វែងរកដំណោះស្រាយចំពោះបញ្ហាប្រឈមនានារបស់សាលារៀន។ លើសពីនេះ វាក៏បានជួយត្រៀមរៀបចំផែនការសម្រាប់បន្ទប់កុំព្យូទ័របន្ថែមមួយនៅវិទ្យាល័យព្រែកលៀប ដើម្បីគាំទ្រការសិក្សាមុខវិជ្ជា ICT ក្នុងកម្មវិធីសាលារៀនជំនាន់ថ្មី។ នេះឆ្លុះបញ្ចាំងពីការប្តេជ្ញាចិត្តរបស់គម្រោង IDEAL ក្នុងការជំរុញ និងលើកកម្ពស់ការអប់រំឌីជីថលនៅកម្ពុជា ដើម្បីផ្តល់ឱកាសសិក្សាដែលមានគុណភាពខ្ពស់ដល់សិស្សានុសិស្ស។

 

ដំណើរទស្សនកិច្ចនេះបានរៀបចំធ្វើឡើងនៅសាលារៀនគោលដៅកាលពីថ្ងៃទី១៦ និងទី១៧ ខែកក្កដា ឆ្នាំ២០២៥ ក្រោមជំនួយថវិកាពីអង្គការឆាលហ្វានកូរ៉េ និងប្រតិបត្តិដោយអង្គការ ខេប៕