គម្រោង ការត្រៀមខ្លួនរបស់អាស៊ានដើម្បីទទួលយកបញ្ញាសិប្បនិម្មិត (AI RAP)

១. ប្រវត្តិគម្រោង

 

គម្រោង AI Ready ASEAN ដឹកនាំដោយមូលនិធិអាស៊ាន និងគាំទ្រដោយក្រុមហ៊ុន Google.org គឺជាកម្មវិធីថ្នាក់តំបន់ ត្រូវបានបង្កើតឡើងដើម្បីលើកកម្ពស់ចំណេះដឹងអំពីបច្ចេកវិទ្យាបញ្ញាសិប្បនិម្មិត (AI) និងការសរសេរកូដតាមរយៈ Hour of Code ដែលជាចលនាសកលដើម្បីណែនាំវិទ្យាសាស្ត្រកុំព្យូទ័រដល់មនុស្សគ្រប់វ័យ។ គម្រោងនេះមានគោលបំណងធ្វើឱ្យការសរសេរកូដ និង AI ក្លាយជារឿងសាមញ្ញ សប្បាយ និងអាចប្រើប្រាស់បានសម្រាប់សិស្ស គ្រូបង្រៀន ឪពុកម្តាយ និងសហគមន៍នៅទូទាំងបណ្តាប្រទេសអាស៊ាន។

 

២. គោលបំណងចម្បង

 

គោលដៅចម្បង គឺជំរុញឱ្យមនុស្សត្រៀមខ្លួនក្នុងការទទួលយកបញ្ញាសិប្បនិម្មិត (AI) ដោយបំពាក់បំប៉ននូវជំនាញមូលដ្ឋានសរសេរកូដ និងចំណេះដឹងអំពី AI។ តាមរយៈការយល់ដឹងអំពីរបៀបដំណើរការរបស់ AI និងកូដ អ្នកចូលរួមអាចធ្វើការសម្រេចចិត្តប្រកបដោយបញ្ញា ការពារឯកជនភាព ប្រយុទ្ធប្រឆាំងនឹងព័ត៌មានមិនពិត និងត្រៀមខ្លួនសម្រាប់អាជីពនាពេលអនាគតនៅក្នុងពិភពបច្ចេកវិទ្យា។

 

៣. បច្ចុប្បន្នភាពគម្រោង

 

គម្រោងនឹងធ្វើការផ្សព្វផ្សាយសកម្មភាព Hour of Code នៅទូទាំងប្រទេសអាស៊ាន ដោយលើកទឹកចិត្តឱ្យសាលារៀន សហគមន៍ និងអ្នករៀបចំវគ្គសិក្សាកូដរយៈពេលមួយម៉ោង។ ដោយមានការគាំទ្រពី Code.org គម្រោងនេះផ្តល់ជូននូវសកម្មភាពគួរឱ្យចាប់អារម្មណ៍ និងឯកសារងាយស្រួលយល់ បកប្រែជាង ៤៨ ភាសា ដោយផ្តោតលើការបញ្ចូលការសរសេរកូដទៅក្នុងកម្មវិធីអប់រំ និងសហគមន៍។ គម្រោងនេះនឹងសង្កត់ធ្ងន់លើការប្រមូលទិន្នន័យ និងសក្ខីកម្មដើម្បីវាយតម្លៃពីផលជះ។

 

៤. សកម្មភាពគម្រោងសំខាន់ៗ

 

• រៀបចំព្រឹត្តិការណ៍ Hour of Code៖ រៀបចំវគ្គសិក្សាកូដមួយម៉ោង (តាមអនឡាញ ដោយផ្ទាល់ ឬកូនកាត់) ជាមួយសកម្មភាពដូចជា "AI for Oceans" ឬ "Classic Maze"។
• បណ្តុះបណ្តាលគ្រូ និងសហគមន៍៖ ណែនាំគ្រូបង្រៀន និងអ្នកដឹកនាំឱ្យបង្កើតគណនី Code.org បង្កើតថ្នាក់រផន និងដាក់ការងារឱ្យសិស្ស។
• ប្រមូលទិន្នន័យ៖ ប្រមូលព័ត៌មានប្រជាសាស្ត្រ ព័ត៌មានលម្អិតអំពីព្រឹត្តិការណ៍ និងមតិអ្នកចូលរួមដើម្បីត្រួតពិនិត្យ តាមដាន និងវាយតម្លៃ។
• ការផ្សព្វផ្សាយ៖ ប្រើប្រាស់អ៊ីមែល ផ្ទាំងរូបភាព វីដេអូ និងបណ្តាញសង្គមដើម្បីទាក់ទាញអ្នកចូលរួម និងបង្កើនអ្នកចូលមើល។
• ការប្រមូលសក្ខីកម្ម៖ ប្រមូលសក្ខីកម្មយ៉ាងហោចណាស់ចំនួន ៥ ករណីក្នុងមួយព្រឹត្តិការណ៍ ដោយផ្តល់អាទិភាពដល់ក្រុមងាយរងគ្រោះ ដើម្បីបង្ហាញពីផលជះគម្រោង ។

 

៥. សកម្មភាពសង្ខេប

 

លក្ខណៈពិសេសនៃគម្រោង គឺការរៀបចំព្រឹត្តិការណ៍ Hour of Code ដែលមានរចនាសម្ព័ន្ធច្បាស់លាស់ ដូចជាការណែនាំជាជំហានៗដល់គ្រូបង្រៀន។ ឧទាហរណ៍ គ្រូបង្រៀនបង្កើតគណនីនៅ Code.org បង្កើតថ្នាក់រៀនដែលអាចចូលប្រើប្រាស់បានតាមអាយុសមស្រប (ឧ. ដោយប្រើពាក្យសម្ងាត់ជារូបភាពសម្រាប់កុមារអាយុ ៤-៨ ឆ្នាំ ឬ Google Classroom សម្រាប់សិស្សធំ) និងផ្តល់កិច្ចការ ដូចជា "AI for Oceans" ដែលអ្នកចូលរួមហ្វឹកហាត់ AI ដើម្បីសម្អាតមហាសមុទ្រនិម្មិត។ ព្រឹត្តិការណ៍នេះមានរយៈពេល ៦០ នាទី៖

• ៥-១០ នាទីសម្រាប់ការស្វាគមន៍ និងការធ្វើតេស្តដើមគ្រា
• ២៥-៤៥ នាទីសម្រាប់សកម្មភាពសំខាន់
• ៥-១០ នាទីសម្រាប់ការឆ្លុះបញ្ចាំង ការធ្វើតេស្តចុងគ្រា និងការចែកវិញ្ញាបនបត្រ។ គម្រោងក៏គាំទ្រសកម្មភាពដោយផ្ទាល់សម្រាប់តំបន់ដែលមានអ៊ីនធឺណិតនៅមានកម្រិត ដើម្បីធានាការចូលរួមប្រកបដោយបរិយាបន្ន។

 

៦. ក្រុមគោលដៅនៃអ្នកទទួលផល

 

គម្រោងផ្តោតលើក្រុមអ្នកទទួលផលចំរុះគ្នា៖

• យុវជន (១៥-៣៥ ឆ្នាំ)៖ តាមរយៈសកម្មភាពសរសេរកូដសប្បាយៗ។
• ឪពុកម្តាយ៖ លើកទឹកចិត្តឱ្យគាំទ្រការរៀន AI របស់កូន ឬរៀបចំវគ្គនៅផ្ទះ។
• គ្រូបង្រៀន៖ ផ្តល់ផែនការមេរៀន និងឧបករណ៍សម្រាប់បង្រៀនកូដ។
• អ្នកបណ្តុះបណ្តាល៖ ផ្តោតលើចំណេះដឹង AI និងបច្ចេកទេសបង្រៀន។
• សហគមន៍៖ រួមទាំងក្រុមងាយរងគ្រោះ ដូចជាជនពិការ ស្ត្រី ជនជាតិដើមភាគតិច និងគ្រួសារមានប្រាក់ចំណូលទាប ដើម្បីធានាការចូលប្រើប្រាស់បច្ចេកវិទ្យានេះប្រកបដោយសមធម៌។

 

៧. ទស្សនៈអនាគត

 

គម្រោង AI Ready ASEAN មានចក្ខុវិស័យពង្រីក Hour of Code ទៅជាចលនាមាននិរន្តរភាព ដោយបញ្ចូលចំណេះដឹងអំពីកូដ និង AI ទៅក្នុងកម្មវិធីសិក្សារបស់សាលារៀន និងកម្មវិធីសហគមន៍នៅទូទាំងប្រទេសអាស៊ាន។ គម្រោងនេះមានគោលបំណងផ្តល់អំណាចដល់មនុស្សកាន់តែច្រើនឱ្យចេះបង្កើតបច្ចេកវិទ្យា មិនមែនគ្រាន់តែប្រើប្រាស់វានោះទេ ដោយជំរុញឱ្យមានជំនាន់អ្នកគិតប្រកបដោយការវិភាគ និងបង្កើតថ្មី។ គម្រោងនឹងបន្តទាញយកអត្ថប្រយោជន៍ពីភាពជាដៃគូជាមួយ Code.org និង Google.org ក្នុងការប្រមូលសក្ខីកម្មមានឥទ្ធិពល និងលើកកម្ពស់សមធម៌ ដើម្បីត្រៀមខ្លួនប្រទេសអាស៊ានសម្រាប់អនាគតដែលដឹកនាំដោយ AI។

 

៨. ម្ចាស់ជំនួយ

 

គម្រោងនេះទទួលការគាំទ្រពី Google.org ដែលជាផ្នែកមួយនៃសកម្មភាពសប្បុរសធម៌របស់ Google ផ្តល់មូលនិធិដល់គម្រោង ការត្រៀមរបស់អាស៊ានដើម្បីទទួលយកបញ្ញាសិប្បនិម្មិត (AI RAP) ដើម្បីជំរុញការអប់រំបច្ចេកវិទ្យា និងបរិយាបន្នឌីជីថលសកល។

     

 

៩. សេចក្តីបន្ថែម

 

គម្រោងនេះនឹងសង្កត់ធ្ងន់លើភាពងាយស្រួលក្នុងការចូលប្រើប្រាស់ ដោយសកម្មភាពតម្រូវឱ្យមានការរៀបចំតិចតួចបំផុត (ទូរសព្ទឆ្លាតវៃ ថាប្លែត ឬមិនប្រើឧបករណ៍សម្រាប់ជម្រើសគ្មានអ៊ីនធឺណិត) និងអាចប្រើប្រាស់បានជាង ៤៨ ភាសា ដើម្បីធានាបាននូវការចូលរួមយ៉ាងទូលំទូលាយ។ ការផ្តោតលើការប្រមូលសក្ខីកម្មពីក្រុមងាយរងគ្រោះ បង្ហាញពីការប្តេជ្ញាចិត្តក្នុងការបង្ហាញផលជះចំរុះ ដែលនឹងជួយជាមគ្គុទេសន៍អនុវត្តនាពេលអនាគតរបស់កម្មវិធី។

 

#AIReadyASEAN #ASEANFoundation #KAPEprojects